El 21 d’outubre qu’entra van celebrase los segundos talleres d’etnoarqueoloxía nel pueblu d’Ambás, entamaos pol grupu LLABOR – Arqueoloxía Agraria en collaboración col Archivu de la Tradición Oral d´Ambás (ATOAM), la quesería Ca Sanchu ya’l Conceyu Grau.
A las 11 de la mañana van empecipiar los talleres de queisu ya manteiga. Nenos ya nenas van tener la oportunidá de deprender a faer ya decorar manteiga con Minina ya de conocer ya participar nel procesu d’ellaboración del queisu afuega’l pitu en Ca Sanchu con Marta ya Xel. Nel taller de cerámica van fabricar los sous propios cacíos ya queseras con Orlando, pa dispuéis convertise n’arqueólogas ya arqueólogos por un día, realizando una pequena escavación ya deprendiendo nociones d’esta ciencia con componentes del equipu LLABOR. A meudía, tola xente participante ya las familias van esfrutar d’una comida con productos del sitiu ellaboraos en Ca Sanchu: queisos ya, de postre, la tradicional barreña.
Vamos siguir pola tarde con Ambás, Ramsés ya Tino na tierra’l maíz, onde nos van enseñar a faer una tuca ya esfrutaremos de los talleres de narbasu ya de munecas. P’acabu de la xornada emocionante Ramsés ya Ambás van enseñanos a tocar el pandeiru ya vamos cantar toos ya toas en xuntanza al son de la pandereta ya la gaita.
arqueologiaagraria.wordpress.com 
Un comentario sobre “Ambás celebra la segunda edición de los talleres d’etnoarqueoloxía”